<title>Apadāna</title>
# north
阿波陀那 50品8. (//2025初稿 )
# nikaya
8.沙塔者[[note1#135|長老]][[note4#424|阿波陀那]]
ᅟᅟ
# pali
8. Pulinathūpiyattheraapadānaṃ
ᅟᅟ57.
ᅟᅟ‘‘Himavantassāvidūre , yamako nāma pabbato;
ᅟᅟAssamo sukato mayhaṃ, paṇṇasālā sumāpitā.
ᅟᅟ58.
ᅟᅟ‘‘Nārado nāma nāmena, jaṭilo uggatāpano;
ᅟᅟCatuddasasahassāni, sissā paricaranti maṃ.
ᅟᅟ59.
ᅟᅟ‘‘Paṭisallīnako santo, evaṃ cintesahaṃ tadā;
ᅟᅟ‘Sabbo jano maṃ pūjeti, nāhaṃ pūjemi kiñcanaṃ.
ᅟᅟ60.
ᅟᅟ‘‘‘Na me ovādako atthi, vattā koci na vijjati;
ᅟᅟAnācariyupajjhāyo, vane vāsaṃ upemahaṃ.
ᅟᅟ61.
ᅟᅟ‘‘‘Upāsamāno yamahaṃ, garucittaṃ upaṭṭhahe;
ᅟᅟSo me ācariyo natthi, vanavāso niratthako.
ᅟᅟ62.
ᅟᅟ‘‘‘Āyāgaṃ me gavesissaṃ, garuṃ bhāvaniyaṃ tathā;
ᅟᅟSāvassayo vasissāmi, na koci garahissati’.
ᅟᅟ63.
ᅟᅟ‘‘Uttānakūlā nadikā, supatitthā manoramā;
ᅟᅟSaṃsuddhapulinākiṇṇā, avidūre mamassamaṃ.
ᅟᅟ64.
ᅟᅟ‘‘Nadiṃ amarikaṃ nāma, upagantvānahaṃ tadā;
ᅟᅟSaṃvaḍḍhayitvā pulinaṃ, akaṃ pulinacetiyaṃ.
ᅟᅟ65.
ᅟᅟ‘‘Ye te ahesuṃ sambuddhā, bhavantakaraṇā munī;
ᅟᅟTesaṃ etādiso thūpo, taṃ nimittaṃ karomahaṃ.
ᅟᅟ66.
ᅟᅟ‘‘Karitvā pulinaṃ [puḷine (sī. syā. pī.)] thūpaṃ, sovaṇṇaṃ māpayiṃ ahaṃ;
ᅟᅟSoṇṇakiṅkaṇipupphāni, sahasse tīṇi pūjayiṃ.
ᅟᅟ67.
ᅟᅟ‘‘Sāyapātaṃ namassāmi, vedajāto katañjalī;
ᅟᅟSammukhā viya sambuddhaṃ, vandiṃ pulinacetiyaṃ.
ᅟᅟ68.
ᅟᅟ‘‘Yadā kilesā jāyanti, vitakkā gehanissitā;
ᅟᅟSarāmi sukataṃ thūpaṃ, paccavekkhāmi tāvade.
ᅟᅟ69.
ᅟᅟ‘‘Upanissāya viharaṃ, satthavāhaṃ vināyakaṃ;
ᅟᅟKilese saṃvaseyyāsi, na yuttaṃ tava mārisa.
ᅟᅟ70.
ᅟᅟ‘‘Saha āvajjite thūpe, gāravaṃ hoti me tadā;
ᅟᅟKuvitakke vinodesiṃ, nāgo tuttaṭṭito yathā.
ᅟᅟ71.
ᅟᅟ‘‘Evaṃ viharamānaṃ maṃ, maccurājābhimaddatha;
ᅟᅟTattha kālaṅkato santo, brahmalokamagacchahaṃ.
ᅟᅟ72.
ᅟᅟ‘‘Yāvatāyuṃ vasitvāna, tidive [tidase (sī. pī.)] upapajjahaṃ;
ᅟᅟAsītikkhattuṃ devindo, devarajjamakārayiṃ.
ᅟᅟ73.
ᅟᅟ‘‘Satānaṃ tīṇikkhattuñca, cakkavattī ahosahaṃ;
ᅟᅟPadesarajjaṃ vipulaṃ, gaṇanāto asaṅkhiyaṃ.
ᅟᅟ74.
ᅟᅟ‘‘Soṇṇakiṅkaṇipupphānaṃ [tesaṃ kiṅkaṇipupphānaṃ (sī.)], vipākaṃ anubhomahaṃ;
ᅟᅟDhātīsatasahassāni, parivārenti maṃ [me (ka.)] bhave.
ᅟᅟ75.
ᅟᅟ‘‘Thūpassa pariciṇṇattā, rajojallaṃ na limpati;
ᅟᅟGatte sedā na muccanti, suppabhāso bhavāmahaṃ.
ᅟᅟ76.
ᅟᅟ‘‘Aho me sukato thūpo, sudiṭṭhāmarikā nadī;
ᅟᅟThūpaṃ katvāna pulinaṃ, pattomhi acalaṃ padaṃ.
ᅟᅟ77.
ᅟᅟ‘‘Kusalaṃ kattukāmena, jantunā sāragāhinā;
ᅟᅟNatthi khettaṃ akhettaṃ vā, paṭipattīva sādhakā [sārikā (pī.), sārakā (syā.), sāratā (ka.)].
ᅟᅟ78.
ᅟᅟ‘‘Yathāpi balavā poso, aṇṇavaṃ taritussahe;
ᅟᅟParittaṃ kaṭṭhamādāya, pakkhandeyya mahāsaraṃ.
ᅟᅟ79.
ᅟᅟ‘‘Imāhaṃ kaṭṭhaṃ nissāya, tarissāmi mahodadhiṃ;
ᅟᅟUssāhena vīriyena, tareyya udadhiṃ naro.
ᅟᅟ80.
ᅟᅟ‘‘Tatheva me kataṃ kammaṃ, parittaṃ thokakañca yaṃ;
ᅟᅟTaṃ kammaṃ upanissāya, saṃsāraṃ samatikkamiṃ.
ᅟᅟ81.
ᅟᅟ‘‘Pacchime bhave sampatte, sukkamūlena codito;
ᅟᅟSāvatthiyaṃ pure jāto, mahāsāle suaḍḍhake.
ᅟᅟ82.
ᅟᅟ‘‘Saddhā mātā pitā mayhaṃ, buddhassa saraṇaṃ gatā;
ᅟᅟUbho diṭṭhapadā ete, anuvattanti sāsanaṃ.
ᅟᅟ83.
ᅟᅟ‘‘Bodhipapaṭikaṃ gayha, soṇṇathūpamakārayuṃ;
ᅟᅟSāyapātaṃ [sāyaṃ pātaṃ (syā. ka.)] namassanti, sakyaputtassa sammukhā.
ᅟᅟ84.
ᅟᅟ‘‘Uposathamhi divase, soṇṇathūpaṃ vinīharuṃ;
ᅟᅟBuddhassa vaṇṇaṃ kittentā, tiyāmaṃ vītināmayuṃ.
ᅟᅟ85.
ᅟᅟ‘‘Saha disvānahaṃ [pasādetvānahaṃ (ka.)] thūpaṃ, sariṃ pulinacetiyaṃ;
ᅟᅟEkāsane nisīditvā, arahattamapāpuṇiṃ.
ᅟᅟDvāvīsatimaṃ bhāṇavāraṃ.
ᅟᅟ86.
ᅟᅟ‘‘Gavesamāno taṃ vīraṃ, dhammasenāpatiddasaṃ;
ᅟᅟAgārā nikkhamitvāna, pabbajiṃ tassa santike.
ᅟᅟ87.
ᅟᅟ‘‘Jātiyā sattavassena, arahattamapāpuṇiṃ;
ᅟᅟUpasampādayī buddho, guṇamaññāya cakkhumā.
ᅟᅟ88.
ᅟᅟ‘‘Dārakeneva santena, kiriyaṃ niṭṭhitaṃ mayā;
ᅟᅟKataṃ me karaṇīyajja, sakyaputtassa sāsane.
ᅟᅟ89.
ᅟᅟ‘‘Sabbaverabhayātīto, sabbasaṅgātigo [sabbasaṅkātito (ka.)] isi;
ᅟᅟSāvako te mahāvīra, soṇṇathūpassidaṃ phalaṃ.
ᅟᅟ90.
ᅟᅟ‘‘Kilesā jhāpitā mayhaṃ…pe… viharāmi anāsavo.
ᅟᅟ91.
ᅟᅟ‘‘Svāgataṃ vata me āsi…pe… kataṃ buddhassa sāsanaṃ.
ᅟᅟ92.
ᅟᅟ‘‘Paṭisambhidā catasso…pe… kataṃ buddhassa sāsanaṃ’’.
ᅟᅟItthaṃ sudaṃ āyasmā pulinathūpiyo thero imā gāthāyo
ᅟᅟAbhāsitthāti.
ᅟᅟPulinathūpiyattherassāpadānaṃ aṭṭhamaṃ.
# comp
## 註解
：